ಈ ಕ್ಷಣದ ಕವಿತೆ ೬

ನನ್ನ ಬಳಿ ಒಂದು 

ಕವಿತೆಯಿದೆ.

ಬಹಳ ಇಷ್ಟದಲ್ಲಿ

ಸಾಕಿ ಬೆಳೆಸಿದ ಕವಿತೆಯದು.

ಸೆಖೆಗಾಲದಲ್ಲಿ

ಅಚಾನಕ್ಕು ಮಳೆಯಾದಾಗ,

ಮರಳಮೇಲೆ ಕುಳಿತು

ತಾಸುಗಟ್ಟಲೆ

ಅಲೆಗಳು ಒಂದಾದಮೇಲೊಂದು

ಬಂದುಹೋಗುವುದನ್ನು ಕಾಣುವಾಗ,

ಕಣ್ಮುಚ್ಚಿ ಮುಲ್ತಾನಿಯಲ್ಲೋ, ಶುದ್ಧ ಕಲ್ಯಾಣದಲ್ಲೋ ಕಳೆದುಹೋದಾಗ,

ಮಳೆಗಾಲ ಕಳೆದ 

ಶುಭ್ರಮುಗಿಲಿನ ನಗು ಕಂಡಾಗ,

ಆಕೆ ನಿರಾಯಾಸವಾಗಿ

ಕೂದಲನ್ನು ಮೇಲಕ್ಕೆತ್ತಿ ಗಂಟಿಕ್ಕಿ

ನಕ್ಕಾಗ,

ಹೀಗೆ ಆಗಾಗ 

ಅದು ಇಂಚಿಂಚು ಬೆಳೆದು

ಚಂದವಾಗಿದೆ.

ನನ್ನಬಳಿ ಒಂದು ಚಂದದ

ಕವಿತೆಯಿದೆ

ಹಳೆಗಾಲದ ಕಥೆಗಳ ಹಾಗೆ

ಏಳು ಸುತ್ತಿನ ಕೋಟೆಯೊಳಗಿನ

ಪಂಜರದಲ್ಲಿ ಮಾಂತ್ರಿಕನ

ಜೀವದ ಗುಟ್ಪು ಇರುವಹಾಗೇ

ಈ ಕವಿತೆಯೊಳಗೇ 

ನನ್ನ ರಹಸ್ಯವಿದೆ

ನನ್ನ ಬಳಿ ಒಂದು 

ಕವಿತೆಯಿದೆ

ಆದರೆ

ನಾನದನ್ನು ಯಾರಿಗೂ

ಕೊಡಲಾರೆನಷ್ಟೇ.